లాభాలను నిలుపుకోలేకపోయిన సెన్సెక్స్, నిఫ్టీ... సరికొత్త కనిష్ఠానికి రూపాయి!

దేశీయ స్టాక్ మార్కెట్లు మంగళవారం స్వల్ప నష్టాలతో ముగిశాయి. రోజంతా తీవ్ర ఒడుదొడుకులకు లోనైన సూచీలు, ఇంట్రా-డే లాభాలను నిలుపుకోలేకపోయాయి. బ్యాంకింగ్, ఫైనాన్షియల్, మెటల్ స్టాక్స్‌లో అమ్మకాల ఒత్తిడి ఇన్వెస్టర్ల సెంటిమెంట్‌ను దెబ్బతీసింది. ట్రేడింగ్ ముగిసే సమయానికి సెన్సెక్స్ 114.19 పాయింట్లు నష్టపోయి 75,200.85 వద్ద స్థిరపడింది. నిఫ్టీ 31.95 పాయింట్లు క్షీణించి 23,618 వద్ద ముగిసింది.

సెన్సెక్స్‌లో కోటక్ మహీంద్రా బ్యాంక్ టాప్ లూజర్‌గా నిలిచింది. టైటాన్, భారతీ ఎయిర్‌టెల్, సన్ ఫార్మా కూడా నష్టపోయాయి. మరోవైపు ఐటీ షేర్లు మార్కెట్లకు అండగా నిలిచాయి. ఇన్ఫోసిస్, హెచ్‌సీఎల్ టెక్, టెక్ మహీంద్రా, టీసీఎస్ వంటివి లాభపడిన వాటిలో ఉన్నాయి. రంగాల వారీగా చూస్తే.. నిఫ్టీ ఐటీ, రియాల్టీ, కెమికల్ సూచీలు లాభాల్లో ముగిశాయి. అయితే నిఫ్టీ ప్రైవేట్ బ్యాంక్, నిఫ్టీ బ్యాంక్, ఫైనాన్షియల్ సర్వీసెస్ సూచీలు నష్టాలను చవిచూశాయి.

ప్రధాన సూచీలు బలహీనంగా ఉన్నప్పటికీ, బ్రాడర్ మార్కెట్లు రాణించడం విశేషం. నిఫ్టీ మిడ్‌క్యాప్ ఇండెక్స్ 0.91 శాతం, స్మాల్‌క్యాప్ ఇండెక్స్ 1.17 శాతం మేర లాభపడ్డాయి.

మరోవైపు, డాలర్‌తో రూపాయి మారకం విలువ భారీగా పతనమైంది. ఇంట్రా-డేలో 25 పైసలు క్షీణించి 96.61 వద్ద సరికొత్త కనిష్ఠ స్థాయిని తాకింది. చివరకు 95.53 వద్ద ముగిసింది. ముడిచమురు ధరలు పెరగడం, విదేశీ పెట్టుబడుల ప్రవాహం తగ్గడం వంటి కారణాలతో రూపాయి బలహీనపడుతోందని విశ్లేషకులు చెబుతున్నారు. సమీప భవిష్యత్తులో రూపాయి 96.25 - 97.00 శ్రేణిలో కదలాడవచ్చని అంచనా వేస్తున్నారు. సాంకేతికంగా నిఫ్టీకి 23,600-23,500 వద్ద కీలక మద్దతు ఉందని, పైకి వెళ్లాలంటే 23,800 స్థాయిని దాటాలని నిపుణులు విశ్లేషిస్తున్నారు.